اجتماع المجلس العسكرى 18مارس72 مذكرات سعد الشاذلى

اجتماع المجلس الاعلى للقوات المسلحة:

1. فى يوم 18 من مارس 72 اجتمع المجلس الاعلى للقوات المسلحة برئاسة الفريق صادق حيث ابلغنا ما يلى :
2. 1/هناك شائعات تقول ان خلافا بين الفريق صادق والسيد عزيز صدقى وهذا غير صحيح
3. 2/هناك شائعات ان الفريق صادق على خلاف مع الاتحاد السوفيتى وهذا غير صحيح,حيث ان الخلاف هو خلاف مبادئ
4. 3/هناك شائعة بان القوات البرحية فى مرسى مطرو والاسكندرية قد وضعت تحت سيطرة السوفييت وهذا غير صحيح
5. 4/لقد عاد الفريق عبد القادر من موسكو دون ان يوقع على الاتفاقية الجديدة حيث ان الروس طلبو ان ندفع ثمن الطائرات tu22 والدبابات62والذخيرة بالعملة الصعبة وبالثمن الكامل.وبالتالى فان الطائرة tu22 يصبح ثمنها 5,6 مليون روبل والدبابة ت62 يصبح ثمنها 250000 روبل  وقد رفض الجانب المصرى التوقيع على هذة الاتفاقية بهذة الشروط وبالتالى فأن هذة الاصناف لن تحضر.

                                                      *************************************

تعليق الفريق سعد الدين الشاذلى

*فى غياب الديمقراطية فأن الشائعة هى السلاح الوحيد الذى يستطيع بواسطتة الشعب ان يعبر عن رأية ولكن فى كثير من الاحيان فان القيادة السياسية تعمد هى نفسها الى خلق وترويج بعض الشائعات لكى تخدم غرضا معينا,وفى اعتقادى ان ماذكرة الفريق صادق من شائعات فى اجتماع المجلس الاعلى يوم 18 مارس هو من هذا النوع من الشائعات التى فجرها لكى يخلق العداوة بين افراد القوات المسلحة وبين الاتحاد السوفييتى ولكى يظهر وكأنة هو الذى يحمى مصر من تيار الشيويعية.ان الفريق صادق يكره الشيوعية كراهية شديدة,وهذا امر يخصة وليس لاحد ان يحاسبة على ذلك, ولكن عداوتة للشيويعية قد اعمت بصيرتة فاصبح لا يفرق بين الشيويعة كمذهب ايديولوجى والاتحاد السوفييتى كدولة عظمى تقوم بامدادنا بالسلاح الذى يمكننا من تحرير ارضنا المحتلة .كان كل من يدعو الى تصفية الجو وتحسين العلاقات مع الاتحاد السوفييتى من اجل مصر هو عدو شخصى للفريق صادق بل قد يذهب الى ابعد من ذلك فيتهمه بالانتماء الى الشيوعية والعمالة للاتحاد السوفيتى لذلك فأن ماقالة صادق فى هذا المؤتمر كان فى الواقع هجوما على عزيز صدقى وليس نفيا لهذة الشائعة.

ولنفرض انى اخطأت فى تحليلى هذا وان صادق لم يخلق هذة الشائعات وانما وصلت الية عن طريق استطلاع الرأى الذى يجرى فى القوات المسلحة من وقت لاخر بطريقة دورية ,فان هذة الشائعات لايمكن النظر اليها بجدية نظر الاسلوب الخاطئ الذىتتبعة القوات المسلحة المصرية للحصول على هذة المعلومات ليس سرا ان ادارة المخابرات الحربية لديها مندوبون غير معروفين فى كل وحدة من وحدات القوات المسلحة,وان هؤلاء الافرا يقومون بابلاغ ادارة المخابرات سرا بكل ما يرون وما يسمعون, فلو فرضنا مثلا ان مندوبا واحدا م ضمن الاف الوحدات سمع شائعة كهذة فانها تسجل ضمن الشائعات الدائرة سواء كانت نسبتها واحدا فى الالف ام

 كانت من تأليف شخص واحد."بيفكرنى باللواء الرينى" وبيان المجلس رقم 69"

.ان هذا الاسلوب هو اهدار للفكر البشرى لانة لايمكن لجميع البشر ان يتفقو على كل شئ وان المناقشة الحرة وتسجيل الاراء فى

اسئلة محددة ثم القيام باحصاءات شريفة على هذة الاجابات هى الاسلوب العلمى الصحيح لاستطلاع الرأى.وقد هاجمت هذا الاسلوب فى احد مؤتمراتى الشهرية واوضحت ان مثل هذة التقارير التى تقدمها ادارة المخابرات الحربية للسيد رئيس الجمهورية وللسيد الوزير لا تمثل الرأى العام الحقيقى فى القوات المسلحة.وقد شعر جميع القادة الذين حضرو المؤتمر بسعادة امرة وانا ادلى بهذا القول وأيدونى تأيييدا مطلقا فى كل ما قلتة.ولكنى مع ذلك لم استطع ان اصلح هذا الاسلوب الغريبفى استطلاع الرأى.لأن ادارة المخابرات الحربية كانت تخضع لوزير الحربية مباشرة وعلاقة"ر.ا.ح.ق.م.م"بها تنحصر فى الفرع الخاص باستطلاع العدو,اما فى فرع الامن وتقارير الادارة بخصوص امن القوات المسلحة فكانت ترفع الى رئيس الجمهورية والى وزير الحربية,واذا ارسلت صورة الى "ر.ا.ح.ق.م.م"فهى للعلم فقط والغريب هنا ان هذا النظام  استمر ايضا بعد عزل الفريق صادق وتعيين الفريق احمد اسماعيل بدلا منه فى اتكوبر1972.

ان ادارة المخابرات الحربية فى مصر هى جزء من النظام المصرى.انها احد الاجهزة الثلاثة التى يعتمد عليها الحاكم فى مصر لكى يسيطر على افراد الشعب.هناك هيئة فى المخابرات العامة التى تتبع رئيس الجمهورية مباشرة وهناك المباحث العامة التى تتبع وزير الداخلية ثم هناك ادارة المخابرات الحربية التابعة لوزير الحربية,وتقوم كل من هذة الجهات الثلاث بارسال تقرير شهرى- اذا لم يكن هناك ما يستدعى ارسال تقرير خاص- الى رئيس الجمهورية,ومن هنا يظهر التنافس بين الثلاثة كلا منهما تعتقد انه كلما كان التقرير اكثر تفصيلا كان ذلك شاهدا على مدى اخلاص الادارة للنظام,كما انها تخشى ان تسقط خبرا او شائعة قد تظهر فى تقرير الادارتين الاخريين فيكون ذلك اتهاما لها بانها تغض الطرف عن شئ معين لسبب تريد اخفاءه عن رئيس الجمهورية,ومن هنا كان الصراع المهنى بين الاجهزة الثلاثة.ويتم ذلك كله بتشجيع من رئيس الجمهورية الذى يرى ان تنافس تلك الاجهزة الثلاثة سوف يضمن له عدم قيام اى عمل انقلابى ضدة.

المصدر مذكرات سعد الشاذلى ص106

                            شوفو القصة دى واعرفو بيفكروازاى

كنت اجلس فى احد الايام فى نادى هليوبوليس الرياضى ومعى احد الضباط القدامى الذى كان قد ترك القوات المسلحة فى اوائل الخمسينات وعين فى وزارة الخارجية ووصل الى درجة سفير بها,ثم تقاعد بعد ذلك .اشتكى لى بانة لا يستطيع الحصول على تأشيرة خروج من مصر الا اذا حصل على موافقة القوات المسلحة لانة كان ضابطا يوما من الايام, على الرغم من انة ترك القوات المسلحة من 18 عاما.تعجبت من هذة الاوامر التعسفية ووعدتة ابحث الموضوع.طلبت مدير المخابرات الحربية وبحثت الموقف اتضح ان ما قالى السيد السفير كان صحيحا.فطلبت الغاء هذة التعليمات ولكنة طلب منى بادب ان ابحث الموضوع مع السيد الوزير.بحثت الموضوع مع الوزير فوجدتة يرى ضرورة الابقاء على هذا النظام...لماذا؟؟ لان بعض الضباط القدامى مقيدين فى القائمة السوداء التى بموجبها لا يصرح لهم بمغادرة ابلا.قلت له .لماذا لا ترسلون القائمة السوداء الى ادارة الجوازات  وبذلك تعفون الاف الضباط غير المقيدين فى تلك القائمة من تلك القيود البيروقراطية؟قال لاننا لانريد ان يعرف من هو فى القائمة السوداء انه مقيد عندنا وذلك لاغراض الامن..ولعلم القارئ فان الاصطلاح "لاغراض الامن "هو الاصطلاح الذى يمكن به انهاء ايه مناقشة وتحت ستار هذا الاصطلاح تعاظم سلطات الحاكم ومعاونية فى النظم الاوتوقراطية وتمتهن الديمقراطية وتنهتك الحرمات,,,اى امن هذا؟ كيف تحافظ اسرائيل على امنها وسلامتها وهى فى الوقت ذاتة تمارس الديمقراطية وتحترم حرية الفرد اليهودى الى ابعد الحدود....مذكرات سعد الشاذلى ص113

بعد البراءة يا نقلع يا نلبس مش فارقة كتير

البرادعى:كنا واثقين من البراءة وننتظرها مش قلتلك هنضرب تانى يا منى
ايمن نور:اتمرمطت كتير فى السجن اه لكن بحب الريس
حازم ابو اسماعيل: من سمات المؤمن العفو عند المقدرة والريس اهل لها
محمد حسان: انها اراهدة الله واللهى ما شهدنا عليك سوءا ولا فسوقا يا امير المءمنين قلتها ومازلت اكررها لقد اكرمنا الله بك وبابنك جمال فلتضرب كل من اساء اليك "اميييييييييين"
حمدين صباحى:واضح جدا ان الريس خارج من السجن بفكر اشتراكى مستنير
عبدالله الاشعل: انا يا ريس كنت مرشح نفسى عشان خاطر "عمرو بوسة" بس لكن انت حبيبى
توفيق عكاشة:قولتولى بقى حزمة الجرجير بكام محضرلك دكر بط ياريس يستاهل بقك
حمادة هلال:شهداء 25 يناير ماتو فى فبراير حلو كدة ياريس
ابراهيم عيسى يفتتح جريدة اخبار الهلس والفرفشة

سلمية سلمية سلمية

سلمية سلمية سلمية. "وعلى فكرة سلمية مش خالتى عشان اصحاب الدم اللطيف"..مش مستعد اأذى حد وموت بذنبة ومش مستعد احرض حد على شئ يؤدى لاذيتة وارجع انا بيتى متهنى وراضى البال انى ولعت حريقة..كل شخص شايف فى نفسة الشجاعة ان يحطم سلمية الثورة ياريت نشوفو بكامل تسليحة يوم 8/9 قبل المليونية ويضرب الامن اللى فيها ويحتلها ويرفع عليها علم مصر وبعد كدة يقسمو نفسهم مجموعات تروح تحتل المجلس العسكرى ومجوعات تحتل الوزارة ومجموعات تأمم القناة هأأأو

برضو سلمية سلمية ..واضح ان فى حد شاف فى نفسة القوة والباور دلوقتى اللى كان فاقدهم قبل كدة او فاتو المشاهد الدموية الاكثثر تأثيرا فى الثورة فعايز يعملها ريبلاى ..لأ بعد ازنك احنا زى ما احنا نموت ومنموتش نتأذى ومنأذيش لوحد اعتدى علينا بندافع عن نفسنا لكن مبنستعديش حد احنا لينا مطال عاوزين نحققها واللى هيكسر الخط دة هيلاقى نفسة بكرة فى الميدان لوحدة ومعرض الثورة للنهش من كل من هب ودب فاحمو الثورة بسلميتها

انكتبلى عمر جديد

اد اية ربنا كريم اوى او يمكن ربنا مش عايز يشوف وشى دلوقتى اتمنى يكون لأ ..لتانى مرة انجو من الموت لكن المرة اصعب بكتير ..المرة الاولانية كانت يوم 28يناير على كوبرى قصر النيل بس دى فى ناس كتير نجو منها واكيد اللى استشهد هو اللى خرج كسبان..اما انهاردة الساعة 4.33 عصرا وقت عمرى ما هنساه
رايحين انا واسرتى كتب كتاب بنت عمى والدائرى كان واقف وقفة سودة من الساعة 3 ل4.15 اتجاه مدينة السلام بسبب انقلاب مقطورة على الطريق..بعد ماعدلو المقطورة وفتحو فتحة عل الطريق العربيات تعدى كل العبيات فتحت فى وشها وطبعا احنا كنا متأخرين اصلا لكن مكناش رغم كدة بالسرعة الجامدة اوى ..واذا فجأة العربية بتطوح شمال ويمين تخيلت ان ابن خالتى اللى سايق يكون داخ ولا حاجة فسألتة قالى انا مش عارف دة من ايه وسكت وسلمت انى ميت ميت يا خيرى...اطوحت مرتين وبعد كدة بدأت تلف عمرى ما جربت الاحساس دة طول عمرى بشوفها فى الافلام وبعدين تتقلب عمر ما كان تفكيرى متخيل ازاى العربية بتتحول لكان بيبسى فى لحظ ازاى لفينا لفتين كاملين على الدائرى وربنا ستر مكنش فى عربيات كتير ورانا لان الطريق كان فاضى بسبب الحادثة..وركنا على جنب ووقفت عربيتين يطمنو علينا والعربيات الميكروباص هدت سرعتها وبقت الناس تتطمن علينا بجد الواحد حس ان لسه فينا امل وشعبنا لسة بيحب الفستان البمبى..
احمدك وشكر فضلك يارب انك اديتنى وان مور تايم

9/9 اما /او

مبقاش خافى على حد ان مؤسسة غير ثورية زى القوات المسلحة عمرها ما هتقدر تاخد اى قرارات ثورية وستستمر حركة تبريد الثورة الا ان تتلاشى الثورة او ينتهى الثوار جميعا خلف قضبان السجون الحربية والقلة القليلة الباقية بدلا من ان تطالب باستكمال مطالب الثورة ستتجة لمطالب فرعية لم تؤخذ فى الحسبان وهى الافراج عن الثوار المحتجزين  وتتأخر بقى بقية مطالب الثورة ونبقى عمالين زى اللى قاعد  على ميت خازوق لا عارفين نحقق مطالب الثورة اللى عملناها ولا عارفين نرضى الشعب اللى اتلم حوالينا وخلع بدى بدرى وكمان عاوزين نخرج الثوار من السجون الحربية..خيبة ايه دى
9/9 هى فرصة كل واحد زهق من كل المهاترات والخزعبلات اللى خدنا فيها الجيش بداية من الاستفتاء لحد المناوئة ..مفيش حد محسش ان الثورة بتضيع من ايدية ..استحالة منظر احتلال الصينية يدل ان فى يوم من الايام فى ناس ماتت على مداخل التحرير عشان بس توصل للصينية المحتلة ..هننزل 9/9 نقول للجيش احنا رافضين اجهاض وتبريد الثورة الثورة مازالت مشتعلة بل اكثر سخونة احنا مكناش بنلعب ولا بنهرج يوم ما عملنا الثورة معندناش استعداد نتقابل تانى بعد 30 سنة مع جيل تانى ونقولة اسفين احنا فشلنا ...مبقاش فينا حيل نتحمل لوم وعتاب كل من هب ودب ونسبة كل ماهو مقرف للثورة وكأن الثورة هى وضعت المشير حاكما او تمسكت بشرف المتكاسل المتخاذل وزيرا لسنا مسئولين عن الانفلات الامنى لسنا مسئولين عن اكوام الزبالة فى الشوارع لم نختار حاكمنا ولم نعطيم المدة التى قررتموها يا مجلس يا عسكرى ثم اخلفتم بها ..لسنا نحن من روج الاشاعات بالتمويل الخارجى ولا نحن من اهملنا فى شغلنا وتركنا دماء جنود الشرطة تضيع هباء دائما ما نساندكم ..لسنا نحن من حاكم الناشطة اسماء محفوظ ثم اخرجناها بعد زيارة ان باتريسون للمشير ..ثم نخرج بعدها مهللين بالسيادة المصرية كنا سنصفق للمجلس لو كان افرج عن جميع المعتقلين بما فيهم اسماء تحقيقا لارادة الثورة .....هننزل 9/9 عشان نقفل ملف المحاكمات العسكرية للابد لن تكونو خصما وحكما فى نفس الوقت حتى نتفرغ لتحقيق مطالب الثورة ان كنتو فعلا عاوزين تحققوها ...
او.......انتظار السيناريو الاسوأ فى حالة الفشل لا قدر الله

الشعب يريد دكتور نفسانى

البعض يندرج تحت اسم فضائح والباقى مجرد زكريات طفولة اقتبس جزء كبير منها بدون اذن اصحابها بس اللى لفت نظرى انها مش مجرد اعترافات امام دكتور نفسى"هاشتاج " قد تساعدك فى حل مشكلتك الشخصية بل الموضوع اصبح وكأننا جميعا بما فيهم انا نخبئ عقدا نفسية مميتة لو عقدة واحدة منهم فى شخص غير مصرى كانت قتلتة فما بال شعب باكملة ..انا بجد قلقان علينا والصراحة مكنش عندى الشجاعة ولاكنت حابب انى اقول غلطات او اخطاء ارتكبتها وانا صغير او وانا كبير افضل انى مادام شايفها اخطاء اتوب عنها وانساها افضل لكن لما موضوع الهاشتاج اتحول لذكريات طفولة واخطاء صغيرة اصبح الموضوع اهون بكتير اخترات منها شوية اعرضها ليكم ولا تخلو من بعض العقد فى نفس الوقت 
                   ............................................................
كنت ولا زلت معجب بالأفكار الشيطانيه لنظام مبارك
و انا صغير مكنتش بفوت ركعة فى الصلاة لما كبرت الاية اتعكست بقيت بصلى الجمعة و ساعات العيد
نفسي يبقا عندي فولورز أكتر من اللي عند وائل غنيم
بحقد علي اي حد معاه ايفون او ايباد 2 وانا ياعيني معايا موبايل صيني
بكره العيال اله السيس الي مسقطة البنطلون و البوكسر بتاعها باين ...ذنب امنا ايه نشوف البوكسر المعفن
كنت بضرب كل يوم تقريباً فى اوتوبيس المدرسة
لو هيرسي الجواز علي بنت مصرية مش هتنيل
كان نفسى فى يوم من الأيام أبويا يبقى وزير الداخلية عشان أفشخ أى ظابط براحتى
ليا واحد صاحبى بيقولى ان مصر مش هتتعدل الا لو قتلنا كل اللى فوق ال 40 سنه بمن فيهم ابويا....انا موافقه تماما
 نفسي اعمل فيلم عن قصه حياتي و انا الممثل الوحيد ومحدش يشوفو غيري ‎:)‏
 نفسي أحضر عزا عشان ألبس البدلة وأشرب قهوتي..
 أضربت كتير وانا صغير
 محدش يعرف لحد دلوقتي ان انا اللي اقنعت اخويا يعمل جروب ع الفيس يسب فيه الدين للمدرسة والمدرسين, قبل ما ترفده..
 مره بلعت وانا طفل لبيسة قلم وفضلت مستنيها تنزل في البي بي
كنت بخاف جداً من العفاريت و الجن لدرجة انى تخيلت فى يوم ابويا وامى منهم ‎
فيه في كل مخابرات العالم قسم للتحليل النفسي للشعوب , انا واثق ان كل الاقسام النفسية للمخابرات قاعده دلوقتي على الهاشتاج ده 
وأنا صغير كنت فاكر ان الكرة الأرضية احنا جواها مش عايشين علي سطحها (A)"
 بابقى في منتهى السعاده لما منتخب مصر للكوره بتغلب من فرقة معفنه .. دوقوا الذل يا متعجرفين يا بتوع سبعتلاف سنه حضانه
كل قرايبي في الجيش بلااستثناء وبكل رتبهم شوية حمير ولا بيفهموا حاجة وعمرهم مامسكوا كتاب وساقطين ثانوية عامة وداخلين واسطة
أي ولد عاش حياته وفي ا?خر بيدور على بنت في اللفة وخام, اسمحلي أقولك .. تيييييت أمك ! 
باسمع تامر حسني وعجبني الألبوم الأخير
 يتقلع لي عين و ابقى شكري سرحان في فيلم شباب امرأه .. حد يسيب تحيه كاريوكا يا جدعااان
و انا عيل كنت فاكر ان الست عشان تحمل..بتقعد تصلي و تدعي
99% من الشباب المصري..اتجوز ايده لفترة طويلة من حياته
كنت بحب بنت في الأبتدائي اسمها مروة ولغاية دلوقتي فاكر نمرة تليفون بيتهم مع اني مكلمتهاش ولا اعرف عنها حاجة من حوالي 15 سنة
رحت شفت بنت ناس اتجوزها لقيت نفسي بكلمها في السياسة و الفيس بوك و رجل المستحيل و حسيت اني اهبل
سالها شهريار" ماهذا الهشتاج الغريب يا شهرزاد !؟ فأجابت شهرزاد بمكر: لاَ تهتم يا مولآى، شوية شباب بيتعرفوا على نفسهم من جديد
 وحشتنى شتايم أبويا ليا ;( ;(
عاندى دكتورة فى الجامعة كل العيال هايموتوا عليها
شايف إن كل البنات بيبقوا أوحش يوم فرحهم بكل العك إللي بيعكوه في وشهم بس مفيش بنت راضية تصدقني
كتير من الرجالة بيفضلوا يتجوزوا من الارياف علشان فاكرين ان البنات هناك قطط مغمضة ‎
وانا فى امتحان العربى كنت بحب اكتب مواضيع السياسيه علشان اكتب عن مبارك وانجازاته والحريه وكل حاجه كدب علشان اخد درجه عاليه
 كانت احلي حاجه في الثورة لما يجيلي واحد كأنه اللص التائب ويقولي إنت كان عندك حق..كنت بحس إني جامد فشخ..
 بدافع عن البرادعي بروحي لكن ف بعض الاحيان مش بكون مقتنع ان البرادعي يستاهل يبقي رئيس جمهوريه
قريت فاتحة بنت يوم الجمعه الساعه عشره بليل وابويا بوظ الخطوبه يوم السبت الساعه 4 العصر
الهاش تاج حيوديني في داهيه أنا نازله أصليوهخلي ماما تفكرني بالبلاوي بتاعتي وبعد الصلاة نرجع نهزي

ترويض الجيش

قبل الثورة بيوم او يومني مش فاكر كنت قاعدم مع واحد صاحبى بحكيلو وفرحان بعشم عن ثورة تونس ومسيرنا فى يوم من الايام هنعمل زيهم على اساس ان فكرنا متقارب وكنت متوقع منه كلمة حماسية تخلينى ان شالله اسيب الامتحان وانزل اول يوم 25 لكن للاسف فاجأنى وقاللى "انت فاكر جيشنا زى جيش تونس انسى ياعم كولو هينزل وهيضرب من اول يوم زى ما حصل مع بتوع الامن المركزى قولتلو يا عم حرام عليك الاحباط دة امال هنتحرك امتى بعد ما نموت امال ايه لازمتنا كلام فى كلام وخلاص نعمل اللى علينا والباقى على ربنا " كنت حاسس بكمية احباط رهيبة بس اقعد على الفيس ولا قابل زمايلى فى الجامعة يجيلى الحماس تانى واقول استحالة هنكمل حياتنا على هذا الاساس الروتينى العقيم والا يلغو قصص التاريخ الفاضية اللى عمالة تقول اعظم شعب واى كلام فارغ تانى طالما دة حالنا دلوقتى..المهم خلصت من الحوار مع صديقى الاولانى اننا عمالين بنخلق تهمة لم تحدث جريمتها بعد يعنى عمالين لسه بنتوقع الجريمة رغم اقرارى ان الجيش كمؤسسة استحالة تكون سلمت من الفساد الا اذا كان فى ملايكة ومكنش فى امثال"مباركوحسين سالم وعمر سليمان وصفوت الشريف وغيرهم من اركانها"....
حدثت الثورة اول يوم منزلتش التانى منزلتش التالت والرابع منزلتش خلصت امتحانات يوم 27 ونزلت يوم 28 فوجئت بالاعداد الرهيبة على كوبرى الجلاء وانا خارج من محطة الاوبرا قولت استحالة ولا ميت جيش يقدر يرجعنا كنت فاكر ان دة اخرنا لكن اتضح بعد معركة قصر النيل الاولى والرجوع للخفلف شوية لقينا الاعداد بتزيد اكتر  ساعتها جالى احساس يقينى اننا انتصرنا خلاص وخلعنا مبارك...
طبعا متخلعش فى لحظتها بس مجرد نزول الاعداد دى كان انتصار فى حد زاتة  بعد انسحاب الشرطة وفتح الكوبرى قمت مروح وروحت بعد اليوم  الكئيب.وبليل سمعت قرار نزول الجيش اول حاجة كانت الحرس الجمهورى عند ماسبيرو وعرفت ان اتحرقت المدرعات قلت بس كلام صاحبى صح  استنو اليلة تخلص وقامو جايين..بعد كدة قالو لأ دة مش الجيش ونزل الجيش والناس هتفت "الجيش والشعب ايد واحدة"..نزل صاحبى اللى قلت علية معايا فى يوم بسبب ظروف منعتة من النزول قبل كدة لقى النا بتهتف الهتاف دة قام متنرفز وقايلى هما بيهتفو كدة ليه هو الجيش كان بيقدم لنا هدية وبنشكرة عليها لو عايز يضرب يضرب استحالة الشعب يكون الخسران.قلتلو ياعم انت بتحضر البلا قبل وقوعة لية هو انت كنت عاوزة يضرب ولما مضربش بتللكك برضو عاما هو مش هدفنا دلوقتى الثورة متقدرش تضرب فى ميت اتجاه الا لما تحقق الهدف الاول بخلع الرئيس والجيش كان لازم نحطة فى عبنا من اول يوم حتى لو مش مأمنين له"حتى الناس كانت بتفرق اكل ويوسفى وبرتقال على الجنود والظباط والحالة ماشية فل"....
لحد كدة والجيش تمام اللهم الا من بعض حالات اللى سمعنا عنها من اختطاف نشطاء وتهريب المجرمين الذين كان يتم التحفظ عليهم فى موقعة الجمل..
النقطة الاهم من وجهة نظرى ان الجيش اللى كنا بنلصق بيه جريمة سينفذها فى المستقبل ولم تحدث"لان ببساطة الثورة كانت اقوى بغض النظر عن اى احتمالات اخرى من رفض اوامر اطلاق النار وغير اما نشوف شهادات المحكمة هتقول ايه ولا كان كلام تليفزيونات " فانتفاء التهمة لا يكسى المتهم ثوب البطول بل علية ان يكتفى بثوب البراءة ويكتفى بذلك...
دة ببساطة من وجهة نظرى كان ترويض الثورة للجيش حتى نالت اهدافها اما ما يجرى الان هو العكس "ترويض الجيش للثورة "
من 11 فبراير لحد انهاردة اعكس المقال هتلاقى الجيش هو اللى بيعمل ثورة تانية عشان يقضى على نظام الثورة وبدأت بالحركات الاساسية الداعمة للثورة على اختلاف افكارها وهو نفس الدور الذى كان سيلعبة مبارك حال تركنا له فرصة ستة الاشهر التى وعد الجيش ان يترك السلطة بعدها ولم يفى بوعده

الاخوان وجمعة العراك السياسى

فى الكام يوم اللى فاتو دول بعد عدم مشاركة الاخوان فى الجمعة 27 "وهذة هى التسمية المفضلة لى" اعلن بكل شجاعة عن مراجعة وتغيير فى موقفى فى بعض الامور المتعلقة بالمشاركة دى فى البداية انا كنت رافض تسميتها بالثورة التانية واللى شفتة عل الفيس وتويتر من تحفيزات واستعدادات كأننا هنرجع ل28/1 ورصاص وغاز وبصل وخل ومجزرة تانية بمعنى اصح..خلال مكالمة محمد البلتاجى مع ابراهيم عيسى امبارح اعلن برضو ان الجماعة كانت رافضة هذة التسمية ..لحد هنا كلام مقبول طيب ليه برضو مشاركتوش على اعتبار انها جمعة المحاكمة والفساد زى بتوع ائتلاف الثورة ما قالو ردة على ما اتذكر انه راى مؤشرات كتير بتقول انهه غدا الجمعة فى قوى سياسية او جماعات شبابية هترفع مطالب بدستور جديد خلافا لما جاء فى الاستفشاخ الدستورى وعلى حد كلامة مكانش عاوز الميدان يتحول لعراك سياسى والاولى انهم يتفقو على مطالب واحدة تعرض على المجلس ولما سالة ابراهيم عيسى مشاركوش ليه فى الجمعة اللى قبليها قال انهم من حقهم يرفضو المشاركة كجماعة سياسية واعتقد ان دة اتكسر بمشاركة افرادها فرادى وانا متفق معاه فى موضوع الميدان والعراك السياسى اما مشاركة ولا مش مشاركة كجماعة ميخصناش فى حاجة كل واحد وليه اسلوبة نيجى بقى لحد مصيبة الاخوان الكبيرة اللى فى نظرى مبررات البلتاجى كانت واهية عليها وهى تسميتها بجمعة الوقيعة واستخدام اسلوب التخوين والتوقيع باسلوب ميتناسبش ابدا فى وقت زى دة اللى بيغلط غلطة لازم يشوف النجوم فى عز الضهر لحد ما يتوب عشان ميكررهاش تانى دة غير طبعا الاخوان وحبايبهم على النت اللى سموها جمعة العلمانيين والملحدين دة ببساطة كان تلخيص موقف الاخوان من يوم الجمعة 27/5 من وجهة نظرى...
نيجى بقى لجانب غير قليل من المشاركين يوم الجمعة باعتبارها ثورة تانية طبعا دة مكنش موقف الميدان كلو الحمدلله يعنى بجد حسسونى بمدى الاهانة اللى بيهنيوهالنا لأ والاعلام كانت عاجباه التسمية تقريبا طب على الاقل استنو الناس بتوع الثورة الاولى يخلصو ثورتهم فى الميدان وبعد كدة زوقيا ابقو تعالو اعملو ثورتكو لكن متدوناش كتف كدة وطبعا رفعهم لمطالب سياسية  كان اكبر مصيبة اولا قسم الناس نصين بين مؤيد ومعارض ودى طبيعة السياسة لكن عمرها ماكانت طبيعة الميدان  ودة كره الناس اللى قاعده فى بيوتها فى الثورة سواء كانو حزب كنبة ولا حزب انترية فى الاخر هما اللى استفتو واختارو مصيرهم الحاجة التانية ان انا شايف دة غباء سياسى ولهث وراء اى مكاسب سياسية على حساب الناس اللى بتموت كل يوم حرقة على ولادهم اللى استشهدو واللى فقدو عيونهم وكأن مفيش احترام حتى لدول...اتمنى ان الفترة اللى جاية متمشيش بمنطق الغالب والمغلوب وننتصر كلنا مع بعض زى ماحققنا النصر قبل كدة برضو مع بعض

الجيش خط احمر المجلس عادى خط اخضر

الشعب عمل ثورة واطاح بجهاز الشرطة

نزلت مدرعات الحرس الجمهورة واتحرقت

نزل الجيش وادي دوره كجيش وطنى ولم يجامل الثوار بعدم ضرب النار لان دة دورة اصلا المفروض علية مش اللى بيمن بيه علينا ولان قوامة هما اخواتنا وزمايلنا فى الجامعة وجيراننا اللى عمرهم ما هينفذوا اى اوامر بضرب النار

الجيش كجيش مارس افعال خاطئة خلال الثورة تغاضى عنها الكثيرون وانا منهم حتى لا يوخذ الكلام انه انقلاب على الجيش من اجل تفكيكة وليس من اجل اصلاحة..ولكن للحق لم يكن داعى لذكرها مقارنة بموقف الجيش الوطنى من الثورة والثوار بوجه عام

بعد كل هذة الدماء التى سالت والتضحيات الشعبية من اجل الحرية والكرامة والعدالة الاجتماعية مسك الحكم المجلس العسكرى اللى من وجهة نظرى لضمان الخروج الامن لمبارك ومع ذلك رفضت الفكرة وطردتها من راسى ولم تؤخذ منذ توليه اى خطوة جادة الا تحت تأثير شعبى وجماهيرى وتم التعامل مع المظاهرات مرة بدبلوماسية ومرة باختلاق ان فى ناس غريبة غير الناس الاولانيين هما اللى بينزلو المظاهرات بتاعة يوم الجمعة وطبعا دة غلط لان كل جمعة كان بيبقى فى اسر وناس كبيرة وشباب عادى زى ايام الثورة بالظبط ومع ذلك الناس قدمت السبت للمجلس العسكرى ومبقتش تتظاهر الا يوم الجمعة لتاكيد استمرار الثورة ومع ذلك استمر البطء فى المحاكمات واللجوء للقرارات القديمة ومشفناش اى قرار ثورى واحد ثورى مش بمعنى ظالم بمعنى ان فى مؤسسات فاسدة واجهزة خرج عليها الشعب ولم يؤخذ اى اجراء ولو مؤقت بحلها وانتظرو الشعب هو اللى يحلها بنفسة وهو ياخد الخطوة من بعدة..وجدنا كل القرارت تؤخذ بعد استيفاء الاجراءات وكأننا معملناش ثورة حتى المحاكمات لم تكن علانية وكانها سر على الشعب اللى كان عارف وحاسس بالظلم اللى وقع علية وعشان كدة اكيد خرج لكن تعامل المجلس العسكرى يوحى انه لم تقم ثورة وان الحفاظ على استقرار البلد يتلخص فى الثبوت على الاجراءات القديمة فى التعامل وظهر عدم قدرة المجلس العسكرى على الادارة السياسية وفشل ما يسمون بالنخبة السياسية من يوم الاستفتاء الذى جاء على غير رغبتهم فى البداية لم يتمسكو بحق المواطن فى الحصول على المعلومات الصحيحة عن الاستفتاء ونتائجة واكتفو باعلان ان رافضين لفكرة التعديل بعد فوات الاوان وبعد ما اصبح امر واقع والخطأ التانى انهم لم يتمسكو بنتيجة الاستفتاء اى كانت وجعلو المجلس العسكرى يضرب بالنتيجة عرض الحائط واصبحت توضع قوانين ومواد خلاف المواد التى تم الاستفتاء عليها املا فى الحصول على دولة مدنية لن تأتى فى نظرى نت قاعدة ديكتاتورية..الخطأ التانى للمجلس انهم بعد اقالة شفيق على مضض فى عز سخونة الثورة عينو شرف باختيار الثوار الرجل الذي يعمل ويجتهد ويحاول ارضاء الجميع لكنة لا يقرر فهو لم يقرر قرار واحد منذ تولية رغم انه جاء بلارادة الشعبية وليس بارادة المجلس

*المجلس يحاكم المدنيين بتهم البلطجة واخلال بالامن وكلو بيتاخد عاطل فى باطل حتى لو كان مش بلطجى فى حين الرئيس المخلوع المتهم بالقتل يحاكم مدنيا فيا يكون حكم العسكر كله مدنيا او يكون كله عسكريا

*التعامل العدائى مع المجلس العسكرى اعتقد هيضر الثورة اكتر من نفعها فهو بيمثل مصر الان سياسيا وعسكريا لكن التخلى عن نقدة والتطبيل ليه هو دة اكبر مصيبة اذا كنا عايزين اصلاح فالنقد واجب وواضح كمان ان المجلس اصبح غير قادر على قيادة الدولة ويتعامل معنا على اننا لا نفهم ولا يجب ان نفهم ويجب ان نكتفى بما حققناه

*اشكر المجلس العسكرى على تلك الفترة التى اخطأ فيها واصاب وادعوة لترك الحكم المدنى لوزاره شرف ويكتفى بضمان تنفيذ ارادة الشعب حتى ميعاد الانتخابات

* اؤيد كل من ينزل لضمان استمرار الثورة لضمان تحقيق مطالبها وارفض تسميتها بثوره تانية على العسكر فهى هى نفس الثورة لم تتغير واذا كان لدى من الدافع والاحتقان ما جعلنى اخرج على مبارك فليس لدى نفس الدافع للخروج على المجلس العسكرى او الجيش فاذا كانت نفس الثورة اهلا وسهلا لو حاجة تانية كما يخيل للبعض انا ضدها

احداث امبابة برواية شاهد عيان"اللهم احفظ بلدنا شر الفتنة"

الحكاية زى ما سمعتها من واحد صاحبى ساكن فى امبابة شاهد عيان على احداث الخناقة وما قبلها  من احداث تم حكيها له نيجى الاول للاحداث قبل الخناقة....
بدأت باشاعة جت لراجل مسلم ان مراتة المسيحية اللى اعلنت اسلامها واختفت من تلات شهور واسمها عبير موجودة فى كنيسة مارمينا بعد ما سفروها من اسيوط راح الراجل قال الخبر دة لمجموعة من الشيوخ واتطوعو الشويخ دول وراحو الكنيسة هناك استقبلوهم كويس وسمحلهم انهم يفتشو الكنيسة لو عاوزين كدة جالهم خبر وهما هناك  انها مش موجودة فى الكنيسة دى موجودة فى مبنى ورا الكنيسة..طلب الشيوخ انهم يفتشو المبنى دة حصلت بينهم مناوشات وخرج المشايخ دول من الكنيسة واتحدف عليهم طوب من اسطح البيوت مش الشيوخ دول ورجعو معاهم مجموعة اكبر ومتجهين ناحية الكنيسة يفتشوها بالقوة كل دة ومفيش اى تدخل من الاهالى ومازالت فى نطاق ضيق وقفو ادام الكنيسة وقعدو يهتفو وهما ماشيين فى شوارع امبابة اسلامية اسلامية ولما وصول عند الكنيسة  تم استقبالهم بالطوب وقنابل المولوتوف ....

الجزء اللى شهد عليه صاحبى وهو شخص عادى مش تابع لاى تيار اسلامى  حكالى انه على جانب تانى فى البصراوى فى قهوة يملكها شخص مسيحى معروف فى المنطقة "بس انا نسيت اسمه اللى قالهولى" الشخص دة خرج هو واولادة من القهوة معاهم بنادق اليه وضربو نار على اهالى فى الشارع فجأه جه ناس مسلمين هما كمان مسلحين ببنادق اليه واصبح اهالى المسلمين بيضربو فى اهالى المسيحيين  جزء بيضرب بالنار وجزء اللى يلاقى اى شئ يخص المسيحيين ويتلفه سواء محل او اى شئ فى وسط زجاجات المولوتوف بتتحدف من فوق اسطح المنازل فى منطقة اغلب سكانها من المسيحيين وهى معروفة بكدة فكانت معظم المحلات التى تم تكسيرها اونهبها خاصة للمسيحيين واستمرت المشاجرات وضرب النار مستمر بين الطرفين لمدة 8 ساعات بدون اى تدخل من جيش او شرطة سقط خلالها ضحايا كتير من الجانبين......ثم بعد هذة الاحداث الدموية تمت دعوات وهتافات فى الشوارع بحرق الكنائس بعد اشاعة بحرق جامع او التوجه لحرقة  حتى وصول خبر حرق كنيسه العذرء ....نسيت اقولكو ان صاحبى دة قالى ان الشيوخ اللى راحو اول مرة وبعد كدة رجعو معاهم ناس تانية مكنوش شيوخ ولا حد شاف سلفيين فى الخناقة اللى بالاسلحة دى خالص كان فى منهم فى المظاهرات والهتافات ..تاريخ الرواية دى كان امبارح بالنهار..
تعليقى :كل جاهل اشترك فى الجريمة دى بدأ بالشيوخ اللى وقفو ادام الكنيسة بالبلطجية اللى حدفو على بعض مولوتوف بالاغبية اللى بيتعاملو مع بعض بالاسلحة ميكفتيش فيهم اعدام..

ايه اللى حصل بين حسس والوزرا بتوعة من 23 يناير لحد 28 يناير(3)

المشهد الخامس 28/1/2011 جمعة الغضب اليوم الذى شكل معالم الثورة ككل
تليفونات متتالية ومتسارعة بين قيادات الحزب الوطنى ووزير الداخلية وابو طويلة احمد نظيف
نظيف:ها يا عادلى عملت ايه انهاردة .العادلى:متقلقش خلاص كلها سعتين تعب بعد الصلاة ونخلص اقفل دلوقتى يا فندم جايلى مكالمة هاكلمك بعد ما اخرج من الجامع على طول
العادلى:ايوة يا اسماعيل فى ايه.اسماعيل الشاعر:تعليمات سعتك يا فندم جاتلى انباء ان البرادعى فى جامع الاستقابة ومعاه شوية صحفيين
العادلى:ايه يا اسماعيل انا اللى هافهمك شغلك انقلو الجامع من الجيزة يلا سلام..احمد عز:ازيك يا جمال الباشا عامل ايه ..جيمى:لا تمام كلو تمام اهو بيتابع بتوع المعارضة عاوزين يعملو ايه
احمد عز:والله يا جيمى انا لو من الباشا كنت امرت بسفلتتهم بالارض خسارة فيهم الحرية والله ميستحقوهاش ,,جيمى:لا يا راجل متقولش كدة الريس انت عارفة قلبو طيب هو اده تعليمات للعادلى يضرب رصاص بس ميستخدمش لا قنابل ولا الغام عل الطريق زى ما اقترحت علية,,احمد عز:طب ايه وجهة نظر الباشا فى كدة ,,جيمى:بيقولك يا سيدى منها بنوفر فى الاسلحة اللى جايبنها بالشئ الفلانى ومن ناحية تانية دى اللى عجبتنى اوى قالك هنستفاد منهم بعدين سواء فى اعمال السخرة فى المصانع او الشركات او نشغلهم فى الفاعل فى المدن الجديد بعد ما يتربو الاول,,,احمد عز:الباشا عالى عالى يعنى دماغة توزن بلد انا لسه بتعلم منة لحد انهاردة.جيمى:يلا سلام دلوقتى عشان اكلم الريس
***الوضع يزداد سخونة كلما اقتربت الجمعة على الانتهاء
العادلى لاحد القيادات:التحرير مقفول كويس ,,,القيادة :تمام يا فندم التحرير متحصن مفيش جنس مخلوق هيهوب ناحيتة..العادلى: طب تمام وحياة امى لاربيهم ويبقى دكر يهوب ناحية الميدان يانا يا هما انهاردة بقولك ايه انا مش عايز كلب فيهم يرفع وشة فى الداخلية بعد كدة لازم يروحو يلبسو طرح ويعدو فى بيوتهم العيال دى
القيادة:اكيد يا فندم كلنا تلاميذ سعتك وهو دة اللى منبهين علية لكل الظباط""وتقريبا دة هو اللى حصل بالظبط بس بشكل عكسى"
العادلى قفل وكلم القيادة المسئولة عن قصر النيل بنفسة:ها يا بطل ايه الاخبار عندك عل الكبرى,,القيادة:كلو تمام يا فندم اطمن الجو جميل والشمس حلوة وادينا قاعدين اؤكد لسعتك ساعتين زمن هانخلص ونيجى نحتفل عند سعتك فى المكتب
العادلى:انا طول عمرى بثق فيك ودة اللى خلانى اختارك بالاسم عشان تامن الكبرى..القيادة:شكرا لثقة سعتك يا فندم..
اسماعيل الشاعر لكل القيادات لاسلكيا:يلا كلو يجهز الجمعة بتنتهى  عندى وكلو يبقى جاهز الشوراع كلها تتقفل تموتو ومحدش يخش التحرير..كلو فى نفس واحد:تمام يا فندم
****وحانت اللحظة التى لم يتخيلها اكثر قيادات الداخلية تعتيما للصورة وانفجر البركان الثائر يحيطة هالة من ادخنة القنابل المسلية للدموع حيث موقعى على كبرى الجلاء وحالة من الكر والفر والزحف يزداد بلا هوادة وتقهقرت قوات الشرطة حتى بداية كبرى قصر النيل ناحية الاوبرا والثوار فى تقدم شعارهم* سلمية سلمية* ولكنها تتردد فى اذن الداخلية "ملوخية ملوخية"فاعتقدوها كلمة السر لتفجير ارهابى ربما المهم وصلنا بداية الكبرى وتحت اصرارهم على عدم السماح لنا بالمرور وامام عناد الثوار على عبور كبرى قصر النيل ازداد عنف الداخلية تجاة الثوار وبقت القنابل المسيلى للدموع زى البمبونى بتاع شفيق والثوار يستلمونها ويلقونها فى النيل مع وابل من التصفيق لقيادات الداخلية على حسن تعاونهم معنا  وتقهقرت الشرطة مرة اخرى حتى نهاية الكبرى واعلنت انه لا رجوع بعد ذلك ومع تقدم الوقت زادت قذارة الداخلية واستخمو اقذر الوسائل لتفريق المتاظهرين وهم يصلون العصر بالمياة والرصاص المطاطى الى جانب الاعانة من كلاب القناصة وحمالنا العديد من الجرحى فى ذلك اليوم وتقهقر الثوار السلميين الى الخلف لترتيب الصفوف مرة اخرى ومن ورائهم المدرعات تحاول ان تستعيد مكانها السابق وحصلت علية بالفعل لكن يدين الثوار للعدد الهائل القادم من ناحية الدقى وامبابة لتدعيم صفوف الثوار وهنا كانت نهاية الشرطة وانهارت امام العند الثورى القائم على الحق واحتفل من تبقى وواصل الصمود بدخول التحرير منتصرين وعاد من عاد فى اليوم التالى..
***المشاهد الاخرى قبل النهاية
تفاوتت المشاهد بين احساس بنشوة الانتصار وبين دراما انسانية ومشاهد مأسوية حزننا على الشهداء واكتئاب من الحرب الاعلامية القذرة ناهيك عن الخطابات التى كان يمن بها مبارك على شعبة وياريت ماكان قالها لانها كانت بتزود سعر البيض فى عز الازمة حتى انتهى ببيضة الديناصور الاخيرة او الخطاب الاخير الذى جدد حماس الثورة وانتهت بالانتصار فى يوم الجمعة نفس اليوم المبارك الذى سال فيه دماء الشهداء الابرار ونحن مدينين لهم ولاولادهم وذويهم من بعدهم بتحقيق مصر التى كانو يريدونها
***انتهت****

بن لادن ارهابى قتل على يد ارهابيين بطريقة ارهابية ودفن بطريقة لا تحترم حقوق الانسان لو كنا هانتكلم صح بقى

قبل اى كلام انا لا خبير فى شئون القاعدة ولا خبير فى السياسات الامريكية لكن فى اسس اخلاقية ودينية بستند عليها فى حكمى على الامور وبغض النظر عن الدور العظيم للمقاومة الجهادية الاسلامية ضد الاحتلال  السوفيتى فالامور اختلفت جذريا مع بن لادن اللى بقى بقدرة قادر اصبح شيخ المجاهدين وحامى حما الاسلام .اذا كنا هانتكلم عن بن لادن بموضوعية فلازم نتكلم من باب العدل عن اعداؤه وننحى بينهم الاتنين اى معايير اخلاقية ودينية فالحرب بين بن لادن  من جهة وبين امريكا والغرب من جهة اخرى كانت اقذر ما يمكن طرف ظن انه امتلك العالم واصبح يتلاعب بمقدرات الشعوب واساليب حياتها والتعدى على حرماتها بكل انواع البلطجة السياسية ومعاه كل الاساليب والقوانين الشرعية الدوليه اللى هو امريكا مدت ايدها للطرف الاول عشان يساعدها ويساعد نفسة فى التخلص من عدوها ومنافسها الاول الاتحاد السوفيتى...باختصار اذا كان بن لادن ارهابى دينيا واخلاقيا من وجهة نظر الغالبية العظمى فعدوه مكنش ملاك عدوه كان اقذر وابشع ما يمكن ينتظر كل موقف ليتخذة ذريعة لارهابة اذا كان بن لادن ثبت او لم يثبت تورطة فى تفجير البرجين ودة عمل ارهابى بالتأكيد  لكنة مش العمل الوحيد فامريكا لم تكن اقل ارهابا منه بالعكس دى زادت عليه بقتل ما يقرب مليون عراقى فى حرب العراق منهم الابرياء والمدنيين والاطفال .بن لادن لم يكتفى ظاهرا بمعاداه امريكا دة كمان عادى الانظمة العربية اوكى طب زنب الابرياء المدنيين ايه سواء فى السعودية او الجزائر او المغرب او اليمن او مصر واسلوب العنف اللى مساعده ايمن الظواهرى كان بيدعو الشباب المصرى ليه ايام الثورة عشان يحولها حريقة ويتفرج على بلد يحترق ثم يخرج هو وقاعدتة يعلنان انتصارهما على الانظمة الطاغية والحمدلله محصلش..

بن لادن و اسرائيل وامريكا ككيان سياسى ثلاث اوجه لعملة واحدة بن لادن يحارب باسم الدين اسرائيل تقتل الاطفال بالشرعية اللى بتديهالها امريكا ,امريكا قتلت اطفال العراق وافغانستان وباكستان بالعافية والجبروت والشرعية الدولية اللى بتقتنصها من الامم ال...متحده..الشعب الامريكى اثبت بفرحتة الغامرة بموت بن لادن انه موهوم كغالبية الشعوب العربية ويعانى من نفس الازدواجية فلا هم شافو جثة بن لادن ولا ادانو طريقة قتلة ولاطريقة دفنة ولا قارنو بما حققتة امريكا من دمار بشعوب العالم حتى يعيش المواطن الامريكى هانئ البال..استغرب من كل اللى طالعين يقولو شيخ المجاهدين وامير المؤمنين وقاهر الامريكان هو فعلا سبب قلق لامريكا بس سببلنا احنا كعرب ومسلمين دمار .. حارب الامريكان بالسلاح الامريكى هل كان متصور فى يوم انه هيقضى عليهم هو غير مفاهيمهم اجباريا فى حاجات كتير لكن غيرلنا احنا وجه خريطة العالم لانه نسى ان امريكا هى اقوى دولة قبل ان تضرها لازم تعرف ايه اللى ممكن ترد عليك بيه طالما انت اضعف منها فلا بطولة فى ما فعلة بن لادن من وجهة نظرى غير انه جلب الخراب على المنطقة واخرج لنا الوجه الارهابى للادارة الامريكية اللى كان ابشع ما يمكن زيد على كدة افعالة الارهابية فى الشرق الاوسط من تدمير لفنادق وتفجير شاحنات ودعوات للشباب باعمال ارهابية يبقى منين واحد عاوز يخرب بلدى يبقى مجاهد؟؟؟اين المجاهد من اسرائيل وبطشها باهل فلسطين ليل نهار ؟اين العالم من الارهاب الاسرائيل؟؟لن يجعلنى كل هذا الكره للسياسة الامريكية والارهاب الاسرائيلى الامريكى من التعاطف مع الرد الفعل الارهابى لبن لادن فلقد اساء لدينى وهويتى العربية اكثر من اى شئ ليس بسبب تحريك الالة الاعلامية الغربية ضده لكن انا كعربى لم اكن فخور يوما فيه حتى مع احساسى بالنصر لكل ضربة يلقيها لامريكا.. فسحقا لهذا العالم الملئ بالازدواجية

جماعة "احنا اسفين ياريس المحظورة"

العيال دى وهاقول عليهم عيال زى ماتقال علينا بالظبط ومعرفناش نرد ولينا الشرف اننا كعيال عملنا كل دة بجد بقو حاجة تنرفز يعنى قبل كدة كنا بنقول الراجل مأثر فيكو صاحيين نايمين بتصطبحو بوشو فى اى جرنان فى اى قناة ان شالله ينزلكو من الحنفية حتى واللى حازز فى نفسيتكو انكو لا كنتو فى ثورة ولا ديالو كل اللى حصل انكو اجبرتو 18 يوم تتفرجو على الجزيرة ونشرات اخبار طول اليوم واتفاجأتو ان حبه عين امه مبقاش رئيس كل دة ماشى احنا مفتريين وقللات الادب ومعندناش دم وبنشتم ولسانا طويل ومبنحترمش راجل عندة 85 سنة تمام طيب دلوقتى والراجل  يعتبر مجازا متلقح فى سجن طرة اقل تهمة فيها تأبيدة وغالبا هيوصل لاعدام يبقى ايه لازمة الاستفزاز وقلة الادب على مخاليق ربنا مش عاجبكو لا عصام شرف ولا عاجبكو ثورة ولا عاجبكو حاجة طيب شايفنها فوضى معلش يا أما انتو عندكو قصر نظر يا أما انتو معندكوش ادراك اننا فى ثورة بعد 30 سنة خراب مش مشكلة تعاطفكو مع الراجل دة وارد لكن كمان مش عايزينو يتحاكم؟؟ لأ بقى روحو يا حبايبى سلوه فى السجن هناك او فى المستشفى اللى عايز يبات فيها عشان منظرة ميتهزش ادام الخلق واحنا كثورة رحيمة سبناه هناك ومعملناش معاه زى ماكان بيعمل مع مخاليق ربنا وصممنا انه ييجى يتحاكم هنا زى ماكان مشحطط الناس فى عهدة  اللهم  الا الفنانين ولاعبى الكورة وشوية الوزرا بتوعة اللى مكانوش لاقييين ياكلو ... مش عاجبكو الثورة ..طب منتو وواخدين حقكو فى الشتيمة وقلة الادب طيب جربو انزلو كدة الشارع واطلبو ان المخلوع يرجع كدة او تتوقف محاكمتة رغم ان دة خيال فى خيال بس على سبيل التجربة شوفو بقى فرق المعاملة لا هنزلكو قناصين ولا هنجيب قنابل مسيلة للدموع ولا هنفرقو خالص بالعكس هنتفرج عليكو ونجيب ناس تتفرج كمان ومش هانخلى حكومة الثورة اللى مش عجباكو تمد ايديها عليكو ولا هنخلى العربيات تدهسكو وتدوس عليكو عشان تعرفو الفرق بين شرطة الثورة وشرطة المخلوع بس حذار اى فلة" بكسر الفاء" فيكو يمد ايدو على حاجة من ممتلكات البلد هنقطعلو ايدة ماهى مصر الجديدة دولة قانون مش دولة انت متعرفش انا ابن مين يا حبيبى انت وهو يعنى المخلوع بتاعكو دة من الاخر تنسوه لانه خلاص بح واحمدو ربنا اننا هنسيبكو تفكرو فيه وانتو نايمين ...وادعو ربنا انه ان شاء الله لما ياخد حكم الاعدام اهالى شهداء مصر يعفو عنه بحكم سنة الكبير مش عشان حاجة تانية والسلام ختام

زى ما قال الريس سجن طرة كويس

شعار الناس كلها اللى خرج من تويتر يعبر عن الحدث الغريب والمفاجئ والمصدم لقلوب ومشاعر كل المصريين انا شخصيا جالى حالة ذهول وحسيت ساعتها ان الثورة انتصرت بعد اربع ايام من الاحباط من احداث التحرير بليل اللى انا محضرتهاش لكنها سببتلى احباط وهل كدة الثورة فينيش ولا ايه النظام.مش هخلى تفاؤلى بالايام الجاية يزيد عن حدة بس يكفى انى حتى بعد نجاح الثورة فى اسقاط النظام مكنتش متوقع فى يوم من الايام اننا هنحط مبارك فى السجن حتى لو كدة وكدة بس اهو حصل  يوم تاريخى بكل المقاييس اصحى من النوم الاقى عيلاء وجيمى فى السجن واللهم مالا شماتة لكنه القصاص كانو عايزين يقعدو فى زنزانة واحدة ومش بعيد يكونو طلبو بسين..بعديها خبر ان الريس الحجز بتاعة فى المستشفى مش مشكلة برضو مادام قانونى ,,,المهم ان كلمة حبسة كبير ومكنتش تخطر على بال اكتر المتفاءلين بس ارجع واقول لولا مليونيات الجمعة دى كان فى حاجات كتير فضلت متأجلة لكن مشيئة القدر اللى قدرت الناس اللى عارفه هدفها كان اسرع بكتير من اى تباطوء ممكن....ييجى بعد الخبر الاسعد واللى بعتبرة من وجهة نظرى يفوق حبس مبارك وهو قرار حبس مرتضى منصور اللى ياما سب وشتم وقل ادبة على مخاليق ربنا وشمت فى الكبير قبل الصغير والعكة الكبيرة بتاعة التحريض على المتظاهرين متتخيلوش سعادتى كانت كبيرة قد ايه والله العدل بيريح والاشكال دى لازم نخلص منها..يييجى بعد كدة الخبر الكوميدى اللى بيثير السخرية فى خيالى  كل ما افتكرة وهو التحقيق مع ماما سوزان بتاعة الكتب ومنظرها بالجلابية البيضة والشعر الاصفر منظر بجد يفطس من الضحك وهل هتاخد كتب معاها ولا ايه يلا مش مهم...المهم دلوقتى بالنسبة ان كل الكلام عن بنا مصر والاعمار قبل كدة كان كلام ملوش معنى غير التستر او التسامح مع المجرمين اللى خربو ونهبو ودمرو وتركهم بدون حساب لكن دلوقتى اقدر اقول اننا نفكر فى البنا بكل طاقتنا مع جزء صغير للضغط والتسريع ومتابعة المحاكمة...دلوقتى نقدر نترحم بجد على الشهداء فى جنة الخلد باذن الله والسفاحين والنهابين فى طرة

الريس:ها******يا ولاد الجزمة

الريس طلع نمرة بصحيح وزى ما ابنة الدهل  فجر الثورة قبل كدة بغباءوة الموروث جاى الدهل الكبير يتغابى دلوقتى وبيكيسنا بعد ما تصرف فى كل فلوس البلد .دانتا اصغر موظف عندك فى السجن بيشم هوا دلوقتى وحياة امك لا نزحف على شرم نتغدى معاك.. ملخص الخطاب :انا معنديش فلوس ولا كان عندى ودى كلها دفاتر توفير واللى هيجيب سيرتى بعد كدة يا شعب ابن وسخة هحاكمكو واربيكو ومتنسوش كلمة "اقرر"اللى فى الخطاب .دة حتى الرمة لسه بيقرا من الورق شوفو المسخرة يتعمل فيه ايه دة

ايه اللى حصل بين حسس والوزرا بتوعة من 23 يناير لحد 28 يناير(2)

المشهد التالت:فى كتب وزير الداخلية يوم26/1/2011 يدخل حد الظباط على وزير الداخلية يديلة تقرير احداث اليوم


العادلى :ها ايه اللى حصل ؟؟مفيش يا فندم انهاردة اليوم كان هادى نسبيا بس العيال دى نزلو تانى وانا شايف يا فندم اننا اتهاونا معاهم


العادلى :ليه حصل حاجة جديدة ولا ايه؟؟عدده يا فندم مزادش كتير انهاردة بس انا خايف يا فندم يا خدو على كدة احنا ما ورناش غيرهم ولا ايه؟؟ العادلى:عندك حق العيال دى لازم تتلم هاتلى اسماء اى حد تعرفة من الى محركين الكلام الفارغ دة وابتدى اعمل الازم وابتدى من انهاردة مش عايز الكلام الفارغ دة يستمر لبكرة


المشهد الرابع يوم27/1/2011 صباحا فى مكتب الوزير.يؤدى الظابط التحية العسكرية .سيادة الوزير فى حاجة مهمة عاوز اقولها لحضرتك .العادلى :قول على طول فى ايه؟ حاجة غير متوقعة يا فندم عدد الناس اللى نزلو انهاردة اقل من اليومين اللى فاتو وحركة المرور شبة عادية.العادلى:مايمكن عشان احنا فى اول اليوم وبعدين يبنى دة بكرة الجمعة وكلو هيخرج يتفسح فى جمعة الغضب قال  دة هياخدو علقة وتبقى دى اخر مرة يخرجو من بيوتهم تانى الا وهما لابسين طرح.الظابط:معتقدش يا فندم تلاقيهم خافو من كتر الناس اللى لمناهم اليومين اللى فاتو او زهقو دة الشعب المصرى وانا عارفة اجبن خلق الله واللى نزلو مستحملوش المية هههههههههههههههههه.العادلى:هههههههههههههههههههه(طبعا معندهمش فكرة ان الناس فى امتحانات وهيزيدو كمان شوية)


مساءاا:تقارير لوزير الداخلية تشير الى نشاط واسع محتمل للمتظاهرين غدا الجمعة على صفحات الانترنت والفيسبوك وتويتروتضخم فى اعداد من ينووون حضور جمعة الغضب وانباء تشير انه لن يكون يوما سعيدا من ايام الداخلية.العادلى :يعنى ايه الكلام الفارغ دة محنا شغالين بقالنا كام سنة محدش فكر فى كدة خالص منة لله نظيف اطلبهولى على التليفون.


العادلى:اهلا معالى باشا وحشنا صوت سعتك والله.نظيف:اهلا ازيك يا حبيب به خير.العادلى:ميرضيش سعتك القرف اللى احنا فيه كل يوم دة.نظيف:لا طبعا ميرضنيش بس تقول ايه بقى شوطة تقليد وكلو بيحب يتعرف عل الجديد بس انتو قدها وقدود.العادلى مش الفكرة يا نظيف به بس كنت بقول لسعتك لو تعملولهم اى حاجة تزودو مرتب اى حاجة كدة وخلاص نسكتهم فيها الظباط الصغيرين عمالين يشتكولى ودول ولادنا برضو ميصحش اللى بيحصل ومتنساش ان السويس قايد ومش عارفين نطفيها ازاى والموضوع قلب بجد والتحريرقافلينه من بليل ومفيش عربية هتهوب ناحيتة.نظيف:خلاص يا حبيب اوك ماشى هبحث الموضوع وارد عليك ومتخافش انا هاكلم انس يعمل شغلة فى التليفزيون والقنوات الفضائية اللى ليه دلال عليها يحذرو من موضوع بكرة وهايدهم حرية يتكلمو فى التليفزيون انهاردة زى ما عاوزين وكدة عدانى العيب.العادلى :كتر خيرك يا معالى الباشا بس ياريت القرارات تتاخد بسرعة(بنبرة صوت اعلى لازم يفهمة انه لا راح ولا جة وان مكالمتة دى عشان ينجز) مع السلامة يا فندم


العادلى يطلب زكريا عزمى على التليفون .عزمى يرد:اهلا حبيب الوضع عامل ايه دلوقتى عالله تكونو مسيطرين مش عايز ازعج الريس بحاجة هو بيتفرج على التليفزيون دلوقتى.العادلى:يا زكريا بيه الاخبار ماتسرش ابدا بكرة التقارير بتقول ان فى ناس كتير هتنزل الشارع فى المظاهرات والنت دة لازم يتقفل ونخنق عليهم عشان ميعرفوش يتصلو ببعض.زكريا:ايه الوضع خطير اوى كدة خلاص انا هاكلملك الريس يصدر قرار بقفل الفيس بوك وتويتر وربنا يستر بقى من رد فعلة وشوية وهاكلمك.........


زكريا:مساء الخير ياريس.مبارك مساء الخير يا زكريا خير فى حاجة.زكريا :مش عارف اقولك ايه بس ياريس العادلى كلمنى دلوقتى وقالى ان.....ننن الناس ناوية على مظاهرة كبيرة بكرة واللى مساعدهم فى كل دة موقع الفيس بوك وتويتر.مبارك:والمواقع دى فين ما نضربها ونخلص.زكريا:لا يافندم دى مواقع على النت.مبارك:خلاص اقفل النت كلو وبالمرة افصل تليفونات المحمول كلها انا ناقص وجع دماغ وقولو ينهى الموضوع دة بكرة باى طريقة ممكنة انا مش عايز وجع الدماغ دة يحصل تانى دول واخدين اكتر من حقهم عاوزين ايه تانى يلا مع السلامة قولو يعمل الازم.
*وكانت المفاجأة صباح يوم الجمعة حيث لا انترنت ولا تليفونات ولا اى شئ وكل قيادات الشرطة مصممة على الغباء
........تكملة

ايه اللى حصل بين حسس والوزرا بتوعة من 23 يناير لحد 28 يناير(1)

المشهد الاول قبل20 يوما بالتحديد يوم 23/1/2011: جرس التليفون يرن فى مكتب الرئيس يستدعى مدير مكتب الرئيس فخامة الرئيس ليرد على وزير الداخلية حبيب العادلىويوقلة ايوة حبيب خير فى ايه؟؟يرد العادلى :لا خير طبعا ياريس بس كنت عايز اخد راى معاليك فى حاجة.يرد مبارك:قول يا حببيب فى ايه منتا طول عمرك بتعمل الاول وتقولى انا عملت كذا وكذا ايه الجديد انا مش مفوضك بكل الصلاحيات.العادلى:ايوة يا فندم مفيش جديد ولا حاجة بس انت عارف الشعب المصرى بقى لمابيحب يقلد ويحط حاجة فى دماة قال ايه عاوزين يعملومظاهرات كمان يومين.  مبارك منزعجا:هما مين دول اللى عايزين يا عادلى انت اتجننت!!.العادلى :لا يافندم ولا حاجة اصل دول كلهم شوية عيال بتوع الفسفس دة الفيس بوك والايفنت اللى عاملينة لحد دلوقتى فى 90 الف استجابو ليها فبقول نديهم راحتهم اليوم دة وكدة كدة انا عندى عساكر كفاية واهو يوم مش هيخصر ودة كلو لعب عيال وفى الاخر هينزل عشرين واحد بس.مبارك:فيس بوك ايه ونيلة ايه بس اللى طلعلنا فى المقدر جديد دة انا هامشى وراك للاخر لا يظيطو فيها زى بتوع تونس بس نقول ايه بقى بن على دة غبى ومش فاه شعبة خلاص ماشى يا عادلى بس اليوم دة بس اوك مفيش ايام تانى وهاقفل بقى دلوقتى عشان بنام بدرى.العادلى : وانت من اهل الخير يا فندم لا تونس ايهوبتاع ايه(فى سره طبعا)

المشهد التانى:بعديها بيومين 25/1/2011 مكتب الرئيس يطلب العادلىويتم تحويل الخط .مبارك:ها يا عادلى عملت ايه انا سامع اخبار كويسة قولى تقريرك .العادلى يرد:زى ما معاليك وجهت بالظبط يا فندم اليوم مشى كويس هما كانو كتير شوية  سبناهم براحتم لحد الاخر يقولو اللى عايزينة بس كانو تحت السيطرة وقرصنا ودنهم شوية عشان ميعملوش كدة تانى وميسوقش فيها.مبارك:يعنى عملتو ايه؟؟.العادلى :ابدا ياريسقعدتهم طولت شوية معانا فرشيناهم شوية مياه على كام قنبلة غاز كدة واتفرقو وقالو كل اللى فى نفسهم وخدنا كام عيل منهم كدة لزوم قرص الودن وانتهى اليوم على كدة انا قلت لسيادتك يا فندم كلو تحت السيطرة متقلقش بالك سعادتك.مباك:انت اتجننت يا عادلى قلق ايه وبتاع ايه بس قولى كانو بيهتفو بيقولو ايه ؟؟العادلى :بيقولو اصلاح وتغيير وشوية كلام كدة وعازين نشتغل وكلام المظاهرات دة يا فندم.مبارك :بس يا عادلى.العادلى:اؤكد لسيادتك هو دة بس يا فندم

ثم يغلق مبارك السكة فى وشة بدون احم ولا دستور ويرجع يتفرج على قناة الجزيرة ويضحك........الى اللقاء فى الجزء التانى

كيف تقضى على الفتنة؟؟؟ بمواجهة اللى عملها

من ضمن المواضيع اللى بنتكلم فيها من ساعة اما اتولدنا هى مواضيع المسلمين والمسيحيين .منا اللى بيتكلم بتهريج ومنا اللى بيتكلم بحمقة زيادة عن اللزوم والكلام للكل طبعا ودن خوض فى التفاصيل كلنا عارفينها هنلاقى نفسنا بنردد كلام رموزنا الدينية المتطرفة بكل يقين وشجاعة لان احنا بنميل للاحداث السخنة بطبيعتنا وسايبين للمشايخ والقسسسة المتطرفين الساحة للكلام لانهم لقو فينا الارضية الخصبة اللى يترعرعو فيها وعشان نقضى على الفتنة يبقى حتما ولابد نقضى على الناس دى الاول..

كتير مننا بيظن ان مجرد نقده باسلوب محترم لافكار احد رموزة الدينية هو نقد للدين نفسة وكل من يهاجم تطرف واضح لاحد الرموز الدينية بنفس حدة تطرفهم هو هجوم على الدين نفسة..انا كمان كنت واقع فى الوسواس دة وبقت اى حاجة متعجنيش بسمعها احط فى نفسى واكتم لحد ما انفجرت بقى خلاص مش مستحمل وفكرت ووصلت لنتيجة هاترضى معظم الناس اللى زييى هو ان تخلصنا من كل الاشكال المتطرفة دى اللى بتأذى مشاعرنا وبتحطنا فى حالة تحفز واستعداد للطرف الاخر هو اكبر فايدة للدين لانهم بيتكلمو باسم الدين وغلطة العيل مش زى غلطةابوة..وكل صاحب فكر او عقيدة مؤمن بيها لازم يهاجم كل من يتطرف عن تلك العقيدة او الفكرة لانها طبيعى  هتخوف الناس منها وهاتنغلق على نفسها ومش هاتضم اعضاء جدد انا شخصيا كمسلم محب مدافع عن دينى ارفض اى اساءة لدينى والاساءة اللى بتيجى من غير المسلمين اهون من المسلمين انفسهم فالصورة اللى واصلة عن المسلمين لغير المسلمين فى النهاية المسلمين هما اللى وصلوها لو كانو سيئين هيوصلو صورة سيئة ونفس الكلام عند المسيحيين او اليهود او اى كان وفى النهاية اللى بيظهر من اصحاب هذة الديانات هما الرموز لو كانو عدلين يبقى الصورة كويسة كانو منيلين يبقى الصورة منيلة..باختصار اللى عاوز اقولو ان ربنا لم يقدس الا ما يستحق التقديس فعلا وكل انسان موضوعى سواء مسلم ولا مسيحى او لا دينى حتى هيلاقى نفسة بيقدس نفس مقدسات اصحاب الاديان المختلف معها حتى لو لم يكن مؤمن بيها ..من ينكر دور محمد فى الحضارة الانسانية او دور المسيح فى نشر رسالة الحب والمودة او حتى من ينكر دور بوذا وغيرة من الاشخاص كدور فى الحضارة الانسانية وليس الدينية انسان جاحد ومتطرف لا يفرق فى تطرفة عن تطرف بعض معتنقى هذة الديانات...فالتطرف سمة بشرية فطرية عاملة زى المضاد الحيوي غريبة فى نفس الوقت .تلاقى المتطرفين بيكرهو التطرف بس اى تطرف ؟؟تطرف الطرف الاخر !!ماهو دة شكل من اشكال التطرف برضو

المتطرف المسلم هيفضل يوجع دماغنا ان مبيحبش التطرف بس هو عايز يقضى على غير المسلمين  حماية للمسلمين من رطرف التانيين شفت اللفة!!,المتطرف المسيحى فى بلادنا اللى فيها نسبة قليلة من المسيحيين التطرف بياخد اشكال تانية لنفس الهدف بس صوتها بيكون اوطى شوية وغير ملحوظ الا عند زوى النفوذ اللى عارفين لو قالو حاجة ملايين هتقف تحميهم وتأذرهم وهى دى مشكلتنا اننا بنتكاتف مع المتطرفين..ولما نيجى نرد على المتطرفين نلاقى نفسنا اكتر تطرف منهم ويمكن اوسخ يعنى لو فى ايدينا القوة ساعتها ممكن نولع فيهم طب الحل ايه احنا متطرفين من غير قوة وهما متطرفين بقوة واحنا بنتحمل نتيجة تطرفهم فى النهاية اكيد فى اسلوب محترم لنقد ونبذ التطرف ولازم يكون بحدة وليس بتطرف ..لما الاقى شيخ من بتوع الفضائيات وبعضهم ان لم يكن معظمهم متطرفين كل خطابة اقصاءى فيه نبرة استعلاء على مخاليق ربنا مقارنة بحديث شيوخ اخرين معتدلين يبقى ايه المطلوب منى يا اكون متطرف معاهم واكفر الراجل المعتدل او ابقى معتدل واسكت على تطرف بتاع الفضائيات!!لأ بقى انا هابقى معتدل ومش هاسكت على تطرف بتاع  شيوخ الفضائيات لانه بيسئ لدينى..ومن ناحية تانية الاخوة المسيحيين. المسيحية هى دين المحبة والسلام فالمسيحى المعتدل ليس فقط من يرى التطرف ويصمت ويبتعد عنه لازم يقف ضدة بكل شجاعة ....وللجميع بعض امثلة التطرف منها الظاهر واللى الاعلام ادالة حقة وزيادة ومنه اللى مظهرش طبقا لحاجات انا معرفهاش اكراما للقلة يمكن!! درئا للفتنة يمكن!! بس الوضوح فى كل شئ والمساواة فى النقد والهجوم على الاخطاء هتريحنا من حاجات كتير الشعب المصرى مسلمين ومسيحيين مش مفترسين بيحبو الدم والخناق لو قلتلى فى شيخ سب وشتم المسيحيين ودعا لقتلهم انا هقول عليه على طول مجنون ومعتقدش المسيحيين هايخرجو يموتونا ولا المسلمين لما بيسمعو زكريا بطرس وهما عمال يسب ويشتم ليل ونهار بيبقو عاوزين يموتو المسيحيين  بس اكيد كل الاحداث دى بتخلق كلاكيع فى النفوس.

ودة سرد لاشخاص واحداث اثارت الفتنة وسكتنا عنها جميعا وتخاذلنا:-
ودة لينك بيحصر كل اشكال الاضهاد الدموى اللى اتعرضلها الاقباط فى مصر منها الموثق كاحداث طائفية صريحة ضد الاقباط ومنها ما هو موثق كجرائم قتل عادية
المسيحيين يشعرون انهم لا يأخذون حقهم فى الوظائف المهمة..ولا حتى المسلمين كانو بياخدو حقهم مكنش بياخد حقه الا اصحاب الواسطة وبعض الوظائف واهمها امن الدولة اعتقد كان فيها اضطهاد بس كويس انهم مدخلوهاش ولا ظباط ولا مسجونين

ارفض رفضا باتا كل اشكال الدعوة السرية فى الاسلام او مايسمى بالتبشير فى المسيحية لانها بتخلق لنا مشاكل كتيرة ومازلنا نعانى منها لحد انهاردة ويجب ان تترك الكنيسة والجماعات الاسلامية الحرية لكل فرد فى اختيار ما يعتنق ولا تطاردة الجهتان من كل جانب

كلنا فاكرين المسرحية المسيئة للاسلام فى الاسكندرية وتم السكوت عنها كما يحدث مع كل الاحداث الطائفية 

يرى المسلمين ان امن الدولة محرم على المسيحيين ومكانش بيخش سجونها فى النظام السابق غير المسلمين 

المسيحيين يستاءو من اضطهادهم فى بناء دور العبادة والمسلمين يستاءو من التحايل فى بناء الكنايس

كل اشكال استغلال الدين من اجل هدف تانى غير الدين مرفوضة بالنسبة لى سواء استغلال الدين فى تمجيد ومدح الحاكم كما فعل السلفيين وكلنا شفنا فيديوهاتم قبل الثورة او زى ما كان بيعمل البابا شنودة وتقدرو تشوفو الوثايق اللى هنا 

فى النهاية الناس اللى انا شايف لابد التخلص منها لانها بتعمل فتنة بين الناس من لا فتنة وبتتحكم فى مصائرنا بكل تعنت ومحدش بيقف قصادها وبنشجعهم بكل ما اوتينا من قوة

معظم شيوخ الفضائيات

-البابا شنودة  وتحكمة فى اراء الاقباط وتوجيهم سياسيا واجتماعيا وكأنه صنع من الكنيسة دولة تانية تؤجج الفتنة و اتهامه بالاحتفاظ بفتيات اسلمن وعدم عرضهم للراى العام بحجة انه شأن داخلى فهل هى دولة اخرى ليقول هذة الكلمة

زكريا بطرس

نجيب ساويرس وعرض اراءه فى امور دينية اسلامية لا تخصة

* فى النهاية احب اقول ان العنف والاضطهاد يميل ناحية الاقباط لكن هذا لا يعفى الاقباط والمسلمين من السكوت على اسباب هذة الفتنة وعدم الوقوف ادامها لحد انهاردة مش هاسكت على منافقين تانى مش هاسكت على حد بيلعب بدينى مش هاريح نفسى واتحول ملحد عشان انا مش عاجبنى الشيخ والقسيس

حوار مع صديق برادعى

مش هاطول وهارغى ولا هدافع عن حد اذا كان شايف ان البرادعى مينفعش رئيس طب منا كمان شايف ان عم ابو اسامة البقال مينفعش رئيس ولى اسبابى وملوش علاقة بشخص عم ابو اسامة البقال من قريب او من بعيد لكن وجهة نظرى كدة ومش محتاج تفسير..لكن السؤال هل عم ابو اسامة البقال ينفع يرشح نفسة؟؟؟ اه طبعا ينفع ومحدش يقدر يقولة تلت التلاتة كام وممكن يكون ليه مؤيدين كتير من عندنا كمان هل حد يقدر يقولهم انتو بتهببو ايه لازم تمنعو الراجل دة من الترشح؟؟؟لأ طبعا اذا كانت بتنطبق علية ادنى المواصفات العقلية وعارف ان الثورة والدستور بتكفل لاى حد الترشح مالم يكن على زمة قضايا قضائية...دى القضية باختصار انا عايز ارشح وانتخب عم ابو اسامة البقال اللى بيتقال علية فى بعض الاحيان البرادعى حد له عندى حاجة ؟؟لا طبعا ..طب لما اقابل واحد مش عايز ينتخبة انا ليا دخل برضو لأ ومش مجبر انه يقولى سبب رفضة بس لما حد يجيلى ويقولى ويخبط على بابى ويقولى انت اتنجننت!!!!!!!! عاوز واحد زى دة يترشح وكمان تنتخبة دة بيتهته يا مجنون فووووووووووق من الغيبوبة دة ماسونى دة مشربش من نيلها ولا اتقحرط فى ترابها دة عايز يقضى على الاسلام دة دخل امريكا العراق واللى زاد الطين بلة دة سلم على شاروووووووون يا نهار اسود يانهارسود صاحبى اتجنن وجالو انهيار وبيقول هذيان ومطلوب منى اصدقة طب مالو كدة دة يبقى سوبر مان وهاينفعنا برضو...قلتلو عندك بقى كدة انت تعديت حدود الديمقراطية اللى احنا بسببها شمينا الغاز وكحينا تراب والناس ماتت عشان احنا نتكلم كدة اصلا....

الراجل مش عاجبك براحتك متحبوش دة شئ يخصك لكن تقولى ازاى يسمحولو بالترشح فدة بقى اللى مش من حقك اذا مكنتش عارف الثورة قامت ليه ؟؟؟فدى مشكلتك لوحد ولازم تحلها فى اقرب فرصة والا المرض هيتفشى خصوصا فى بلدنا دى اللى فيها حوالى 60 مليون فرد من اعضاء حزب واحد وهو حزب الاغلبية المسمى بحزب الكنبة ادام التليفزيون ومن فضلك انا معارض للحزب دة ولجل العشم والصحوبية والفضول اللى بيطق من عنيك انا هقولك انا هانتخب الراجل دة ليه لما يرشح نفسة كرأى مبدأى لحين ظهور البرامج الانتخابية لكل مرشح واللى لازم تعرفة ان فى ناس معارضة لفكرة انتخابة مع اعترافهم بحقة فى الترشح وعندهم اسبابهم الموضوعية والعقلانية اللى تخليهم يرفضو انتخابة لكن اسف اللى بتقولة دة وجاى تقولة لحد عندى دة تقريع لمؤاخذة وهو كالتالى

س1:هو البرادعى مصرى اصلا دة معاه جنسية تانية وملوش حق الترشح؟

ج1:يعنى بفكرك دة هو مثلا داخل عافية وبعدين هى لسة التعديلات اتوافق عليها وعاما يا سيدى من بق البرادعى"انا لا احمل سوى الجنسية المصرية ومراتى من كفر الدوار"

س2:طب ينفع رئيس مصر بنتة متجوزة يهودى ما حافظش على تعاليم دينة هيحافظ علينا احنا؟

ج2:رغم ان اللى بيحدد العلاقة بينا وبين الريس هو القانون ورغم ان دى حاجة مقلقة فعلا بس تقول ايه لما تعرف من بقو"ان بنتة متجوزة مسلم اجنبى اعلن اسلامة قبل الزواج واتجوزت على الشريعة الاسلامية وشهد على العقد السفير المصرى فى النمسا

س3:تعرف انة هيقلبها سداح مداح وبطيخ وهيلغى المادة التانية فى الدستور ومفيش اسلام بقى وشذوذ بقى وماسونية والاباحية عينى عينك والشعب هيبوظ وهاتبقى مليطة؟

ج3:تعرف ان مجرد التفكير فى دة فيه اهانة لعقلى يعنى انت متخيل بعد ثورة طويلة عريضة هيييجى واحد يشقلب حال البلد كدة من غير ما ياخد اذننا كدة وبدون احم ولا دستور ساعتها ياحدق لو شعب محترم هانروح التحرير تانى دة اصلا لو خيالة صورلو كدة وهو فى الرئاسة ايش بقى انة قال قبل ما يبقى رئيس وعلى لسانة" لم اتطرق او اعارض المادة التانية من الدستور فكلنا مؤمنون بالمبادئ الاسلامية التى لا يختلف عليها الفقهاء والدين الاسلامى كدين للدولة يمثل هويتها وثقافتها وليس له اى ضرر على حقوق المساواة بشرط تطبيق المساواة.والليبرالية بمفهومى انى ديمقراطى اشتراكى واشار فى حديثة انة ليس رأسماليا"

ج4:ياعم هو مش الراجل دة بقالة تلاتين سنة برةولا عارف اى حاجة فى اى حاجة ولا حاسس بالفقرا ولا دياولو وهيلبقها بزرميط؟

يعنى انت شايف اسم الله التلاتين سنة اللى فاتو كانو كلهم هنا ونعيم على الفقرا طب لو الراجل دة كان تلاتين سنة بيلعب برة كان خد قلادة النيل ولا كان حتى خد نوبل عارف يعنى ايه نوبل طب لو كان هنا مش كان زمانو شارب فساد من راسة لرجلة هتقولى اصلة مكلش فول ولا اتمرمط هاقولك عملنا ايه باللى كلو فول اول ما شبعو بلعونا فى بطنهم واحوال البلد دة انت لو جبت خبير امريكى فى شئون الشرق الاوسط هتلاقية عارف بلدك اكتر منك ايش حال دة مصرى بجد وكان شغال فى مصر مساعد وزير الخاجية فى السبعينات وعيلته كلها فى مصر

س5:دة عميل امريكا واسرائي وبالدليل ايه رايك بقى؟

مين العبقرى اللى قال كدة متقوليش مرتضى منصور الراجل المؤدب الزوق دة بص يا سيدى لازم تعرف حاجة وتبحث بنفسك وتشغل مخك فى اى كلام وماتخدوش كلام مسلم بيه ارجع للتقارير المكتوبة عن العراق وهل هو ذكر فى اى تقرير ليه ان العراق فيها نووى ولا لأ سيبك من دى هل انت متخيل ان امريكا بتبقى منتظرة موافقه شخص عشان تخش العراق دة اسمة تهريج امريكا يا حبيبى دخلت رغم ان الاغلبية فى مجلس الامن ما وافقتش على القرار اما بالنسبة للامروة التانية اسرائيل فدى بقى عدائها للبرادعى كان واضح للعالم كله تقريبا الا المصريين لان احنا كان عندنا رئيس تحرير عالمى اسمة اسامة سرايا يعرف يلبسنا العمة صح ويعملنا من البحر طحينة المهم البرادعى زار اسرائيل بقرار من مجلس الامن بناء على طلب مقدم من جميع الدول العربية للتفتيش النووى على اسرائيل جايين والنبى بعد خراب مالطة يفوقو على اسرائيل المهم اسرائيل شافت انه متعنت معاها ومرضيتش تتعاون معاه اكتر من مرة واتهمتة بالسكوت على المف النووى المصرى وحركت الموضوع باسايبها القذرة واتهمتة بالتواطؤ مع ايران ودخل فى صدامات كتير فى الوقت دة وزاد دلوقتى بعد ما اعلن انة على مصر فتح العلاقات الدبلوماسية مع ايران كقوى فى المنطقة معترف بيها ودى الخلاصة طبعا

س5:ايه راية فى علاقتنا باسرائيل وناوى يعمل ايه؟

ج5:ميخفاش على حد اننا كنا عاملين زى الدلاديل لاسرائيل ودى حاجة تنرفز اللى عنده دم الراجل قال وبصراحة"غزة لديها سجانان اسرائيل ومصر وهذا الوضع لايمكن ان يستمر وان اسرائيل تخشى تطبيق الديموقراطية فى مصر لان العلاقة بيننا ستصبح علاقة تكافؤ وهذا ما يقلقها"

س6:كان فين فى المظاهرات دة ولا جاى يركب الموجة؟

ج6:قبل ما اجاوب لازم تعرف من كل اللى نزلو المظاهرات ان اهم وابشع يوم كان يوم جمعة الغضب 28/1/2011 وان الصمود فى اليوم دة هو اللى شكل معالم باقى الثورة اما بالنسبة للبرادعى كلنا عارفين انة كان برة فى الوقت دة"عارف هتقولو ايه"المهم هو ردة كان كالتالى"لم انزل يوم 25 يناير يناير لانى لم اكن اتوقع مظاهرة مليونية كما لم يتوقعها من شارك فيها وليس ممكن لى ان اشارك فى مظاهرة مكونة من 100 فرد على حسب توقعى"الخاطئ" كما انه كان لى ارتباطات فى الخارج ولم اكن اتوقع سرعة تحرك الشعب ولكنى ايقنت ان الشعب تحرك بالفعل بمفردة وارادتة و نزلت يو 28 وتعرضت للماء والغاز المسيل للدموع فى المظاهرة المليونية مع كافة الشعب واكملت معهم حتى النهاية.

س7:كان فين طول السنة اللى قبل الثورة ولا فالح ينزلنا فيديوهات على اليوتيوب وتويتات على تويتر؟

ج7:البرادعى ردا على غيابة وكثرة سفرة السنة الماضية وقلة تواصلة مع الشعب واقتصارة على الفيس بوك وتويتر:كنت طوال السنة بعيدا عن مصر وبعيدا عن التواصل الاعلامى بسبب الحظر الاعلامى المفروض على حتى فى القنوات المستقلة ومنع القنوات الاجنبية كالحرة والجزيرة من التواصل معى داخل مصر

س8: طب والقذافى ايه راية فيه؟؟

ج8 :زنجة زنجة

حوار البرادعى على اون تى فى هام للمشاهدة 

احب اقول حاجة فى النهاية ميصحش اننا نحجر على راى بعضينا لازم يكون عندنا ثقافة الديمقراطية اللى عمرها ما تصل لحد السب والشتيمة ونتقبل الراى والراى الاخر ونستند فى اتهماتنا على ادلة موضوعية 
روابط قد تفيدك
الاهرام قبل ما تقلب على الوش التانى 
علاقتة بامريكا 
موقفة الرافض للتدخل الامريكى 
معلومات عن تقارير العراق 
الاهرام 2005 
ينفى حصولة على جنسية سوى المصرية 
رسالة من البرادعى للشعب 
رؤية الكاتب بلال فضل للبرادعى 
زواج بنتة على الشريعة الاسلامية 
وجهة نظر شخص عادى زييى وزيك ودى فكرتة الموضوعية عن البرادعى وهو المخرج عمر سلامة 
د/محمد غنيم صاحب اكبر مركز كلى فى الشرق الاوسط:البرادعى افضل من يقود مصر حاليا
مقال د/ احمد خالد توفيق 
لينك مجمع فيه العديد من اللينكات للرد على الاتهامات الموجهة للبرادعى

احنا اسفين ياريس...

سيدى الرئيس كم عانيت من هذا الشعب القاسى القلب المتحجر المشاعر الناكر للجميل الذى طالما خدمتة على مدار 30عاما ولكن جاء الرد على غير المتوقع!!!ماذا حدث للمصريين فبعد 30عاما فى الحكم هى عمر فترتك الرئاسية الاولى !!!وبدلا من ان يخرج الشعب لمبايعتك لفترة رئاسية ثانية قد تكون 30 عاما اخرى او تزيد..واذ فجأة نراهم يخرجون كالسيل الجارف يطالبونك بالرحيل بالزمة دة كلام هو انت لحقت!!دة انت رمز ان لم تكن اثرا من اثار مصر فهل نسى الشعب انجازاتك؟؟؟ ماظنش دة كل اللى خرجو شباب يعنى مفيش زهايمر ولا يمكن مالحقوش الانجازات جايز..نبدأ من زمان واحدة واحدة هل نسو الضربة الجوية"ياريتك كنت ضربتنا احنا وحكمت اسرائيل.فهمى هويدى"هل نسو الاستقرار"معدلات الجريمة خير شاهد"هل نسو انك بطل السلام  وبتقعد فى شرم الشيخ مدينة السلام ومجنب مصر خوض الحروب من زمان معقول نسيو كل دة "دة احنا شعب متعطش للقتل وسفك الدماء وفى نفس الوقت نعاج !!!"لقد حميتنا سيدى الرئيس من الوحوش المفترسة وبقيت من اصدق اصدقاءهم وبقم يدعولك فى صلواتهم وفى الاخر الناس نسيت كل دة لكن تقول ايه الدنيا زى الخيارة...... طب معقول نسيو توشكى وما حققتة للمصريين من كل اشكال الفساد التى يمكن ان يراها بشر والتى طالما حلمنا ان نصل الى هذة المرحلة من الفساد فى مشروع واحد.هااااا دنيا طب ازاى نسيو قطار الصعيد واجمل منظر يمكن ان تراة لقطار وهو متفحم عن اخرة الم تكن انت من عينت كل هؤلاء الوزراء الفذين لتوفير خدمة مواصلات ادمية للمصريين لتنقلهم من دار الدنيا الى دار الاخرة فى اسرع وقت ممكن ودون تكاليف دفن فالجثث قد تفحمت لكن ما هذا الشعب الفاقد للذاكرة انا لو منك كنت سيبتو من زمان دة كمان نسيو العبارة اللى لسه مبقالهاش كام سنة "عبارة الموت السلا98" العبارة التى كشفت لاى مدىنحن نملك رئيسا خفيف الظل وابن نكتة بصحيح لو نسو كل هذا فكلها انجازات لا تقارن بجانب الانجاز الاهم والاعرق فى تاريخ مصر لقد حصلنا فى عهد سيادتك على بطولة الامم الافريقية ثلاث مرات متتالية وياة من انجاز.لقد نسو ان بلد القطن الافضل فى العالم اصبحت بتوجيهات سيادتك تستوردة فى ظل حكمك الرشيد.دة الاغرب ان مش نسيو بقى لأ دول مش حاسين انه كل التقارير الدولية اللى بتشير بحدوث ازمة طعام فى العالم ومن بين هذة الدول ولا فخر ستكون بينها مصر والشهادة لله وزير زراعة سعادتك وفى حل فورى للازمة طالب بمنع زراعة الارز فى مصر حتى نتخلص من ازمة قش الرز والسحابة السودة ودة تفكير علمى سليم 100% ولا نسيو ان الوزير الرئع من قبلة هو من ادخل المبيدات المسرطنة فى مصر وصابح 1/3 الشعب المصرى مصابا بالفشل الكلوى والكبد وفيرس سى...للاف سيدى الرئيس لقد نسو او تناسو انك لطالما كنت تنحاز للمواطن البسيط وفى اليوم التالى تنحاز علية..لقد نسو ان البلد الذى اخرج عالم زى زويل الى الدنيا ومن بعدها الى امريكا هو بلد من اخر البلاد التى تصرف مليما على البحث العلمى فى حين ان العدو الابدى لمصر "اسرائيل اولى بلاد الشرق الاوسط فى البحث العلمى حقا سيدى الرئيس لقد جنبتنا الحروب بس عامل حسابك انك بعد ما تفارقنا موتا لا قدر الله او تركا للحكم ستقع البلاد فى كارثة غير متوقعة فما اجمل واعظم من ان تكون دولة كاملة بكل مؤسساتها قائمة على فرد واحد ان غاب لحظة غابت معة الدولة وتاهت..لقد نسو اننا من اولى الدول المنتجة لنبات الحشيش والبانجو والفائض للتصدير وفى الاخر وبعد دة كلو نسينا انك القائد الاعلى "للقوات المسلحة وقوات الشرطة"ومفيش رصاصة واحدة بتطلق الا باذنك ومع ذلك اتهمناك ظلما وحاشا لله ان اكون منهم بانك المسئول!!! وبمعرفتى بيك طبعا كمواطن عادى وانت قريب من كل المصريين بتطلعلهم فى احلامهم انك لايونكن تعمل كدة ابدا دة انت اخلاق وابن بلد بس معقول عملو كدة من وراك طب ازاى وانت الريس يلا مش مشكلة كام واحد مات فداك كام واحد اصيب وفقدو عينيهم فى داهية...

بس كنت عايز اعرف ياريس هو مش انت اللى بتعين الوزراء والمحافظين وانت الريس يعنى.يعنى عارف كل كبيرة وصغيرة فى البلد ولا حضرتك متعرفش حاجة عن البلد هو مش احنا الرعية اللى الرسول قال انك مسئول عنهم ولا حضرتك كنت فى ملكوت تانى وكل مانجيب سيرة سعتك يقولولنا انتو مبتفهموش هو عارف كل حاجة يعنى؟؟ ولا هو كان خلفكو ونسيكو شعب بقر؟؟يرضيك ياريس نتهزأ على العموم روح ياشيخ الله لا يسامحك كلمة اخيرة احب اقولك ياريس بجد ومن كل قلبى ...............................انا اسف انى استحملتك كل دة

امضاء شاب مفقوع مرارتة

وائل غنيم ما اسموش ميدان التحرير

شئ غريب بيشغل الناس دلوقتى على الفيس 1/ هو وائل غنيم ماسونى ولا مش ماسونى؟ هو مؤسس خالد سعيد ولا مش هو؟؟هو اجندة خارجية تبع امريكا ولا لأ؟؟ انا شخصيا بعتبر اللى يفكر بالطرقة دى وينسى انجاز الثورة الحقيقى لازم يعرض نفسة على دكتور لانه بيعتبر نفسة من القطيع يتجة اينما يتجة يعنى جه واحد قال اعملو ثورة فعملنا ثورة مع ان الدنيا زى الفل وعشرة على عشرة لكن تعمل ايه بقى فى عقدة التقليد تونس عملت يبقى لازم نعمل زيها!!!هو احنا كدة مش هنتغير منقدرش نعد فاضيين خلصنا من ثورة ونجحت الحمدلله عشان مكناش بنفكر فى التفاهات دى قمنا على طول لضمنا فى مواضيع تانية كتير نشغل بيها نفسنا اولها الراجل اللى واقف ورا عمر سليمان اللى لفت انتاهنا كلنا وانا اولهم لكن التعليقات الساخرة والتهريج زاد بشكل فظيع ما علينا تانى موضوع بدأنا نشغل بيه نفسنا هو مين وائل غنيم دة وبيتكلم باسمنا ليه؟؟؟ على اساس يا عينى بقى كلنا جيفارا فجأة وعاوزين احنا اللى نمسك القيادة اقولك عندك حق فعلا وقت قيام الثورة فعلا لانها قيادتها كانت الشعب لكن لما ييجى وقت التفاوض ومتابعة تنفيذ الطلبات خصوصا اننا حققنا اول المطالب واصبح بعدها التفاوض ممكن يبقى ليه ميكونش فى ائتلاف بيمثل الشباب فى تنفيذ المطالب وهما اللى وثقنا فيهم من البداية وكانو من اوائل الداعين للثورة....المهم نرجع لموضوع وائل غنيم بالعقل كدة امريكا واسرائيل وكل الاجندات الخاجية دى عايزة يا حبة عينى المصريين يعيشو فى ديمقراطية وحرية حتى لو كان دة بيهدد مصالح اسرائيل بطريقة مباشرة طب وليه تفرط فى واحد كان قايدلهم صوابعة العشرة شمع اكيد لان الانسانية الامريكية غلبت على مصالحها...تانى نقطة واحد زى وائل غنيم دة ايه اللى يخلية يدافع عن حقوق الانسان ويناهض التعذيب فى اقسام الشرطة ويتمنى بلدنا احسن ويفضل مستغل العدد الضخم فى صفحتة عشان يعلن عن الحركات الاحتجاجية اللى بتطالب بتغيير الحكومة او معاقبة حبيب العادلى او الوقوف الصامت غضبا على رحيل خالد سعيد؟الاجابة يا اما هو شخص مرهف الاحساس بجانب عملة التجسسى لتخريب البلد يا اما استغفر الله العظيم هو بيحب البلد ومش انسان انانى مبيفكرش الا فى نفسة طالما مستريح تبقى تولع الدنيا على اللى فيها!!!!!!!!!اخيرا انا متأكد ان اللى بيثير التساؤلات الخايبة دى ناس مشفوش جمال وحلاوة الناس فى التحرير وخوفهم على بعض وانكار كل واحد لذاتة عشان البلد تعيش حرة
ودة لينك فى بعض التساؤلات الغريبة المطروحة عشان كلنا نبتدى نشك فى صوابع رجلينا ونقول خلاص ارجع ياريس
ودة لينك تانى واحد قال افكر شوية بدل ما تنسى ايه مطالب الثورة وتفكر وائل هو وائل ولا وائل هوميدان التحرير

الثورة قامت... لا تراجع ولا استسلام

الثورة مش دم ودمار الثورة نار


نار بتغلى فى العروق


شعب واقف


شعب صامد


شعب رافض الاحتكار


شعب صابر من صبرة ثار


شعب كان شايل ذكرى من التاريخ


لكن الجلاد ابيح


الشعب كان فى انتفاضة


قالو الكلاب عليها ثورة عيال


العيال دول كدروكو


وفى الشوارع لففوكو زى البغال


كلو كان فاكرة كلام عيال


طلع ثورة ومش اى ثورة ثورة رجال


رجال بجد مش ارتجال


لية ياريس لسة قاعد


لية ياريس الدم فاقد


الناس قالتلك خلاص كفاية


وانت برضو لسة قاعد


خلاص قرفنا خلاص طهقنا


داللى عنده الدم احسن م اللى فى الطراوة قاعد


فين شباب الاهلى والزمالك


مصر قامت فى الثورة ثارت


اياك تقول انت مالك


رجالة نزلت وقفو قدام الشدايد


مش كلام والفعل ساكت


رجالة فعلا والرب شاهد


ناس كانت زيى وزيك


بس قالو العمر واحد


واللى ياخدة رب واحد


اموت وحقى بحاول اخدة


احسن ما اموت عل قهوة قاعد


يلا متفكرش وانزل


منتش اقل ماللى نزلو هما رجالة وانت راجل


قول لابنك لما يكبر


مصر ثارت مصر قالت


للظلم ارحل وانا هناك كنت شاهد


...............غدا الجمعة ميعاد الثورة